’t Verhaol achter ’t kefee.

In ’t pittoreske dörpke aan de Maas, Tegele, sjteit in ’t Maasveld ein kefee-ke. Volges ingewijde bekend as Kefee “De bar nog grôtter den ‘t tuinhuuske”. Ein kefee det zoë knus, sjarmant, gezellig en klein is, det ’t amper op Google Maps te vinge is. En ’t ech zoë klein is, desse via de zuldertrap in de kelder oet kumps en öm nog ekstra plaats te besjpare, d’n ieskas deur naor binne aopent.

De sjtrateegische veurbereidinge veur dit kefee zien al lang geleeje gesjtart. Al in 2005 haet sjpaarkaslid nr 3 gezörg det d’r ein dieke straumaansjloeting woort aangelag. Natuurlik met ’t aug op ein hoëg sjtraumverbroek veur beertap keuling, leech en geluud.

De jaore daonao, hebbe de vrinde van sjpaarkaslid nr 11 (oet privacy euverwaeginge laote we ziene echt naam achterwaege) ‘m kenne euvertuuge det ’t tuinhuuske ömgetoverd meus waere toet ein kefeeke. Ein belangriek ongerdeil heej in, waas öm sjpaarkaslid nr 11 Oeles prins te laote waere. Dit goof de vrinde ein goije gelaegenheid öm auch zien lieftallige vrouw te kenne euvertuuge det d’r now ech ein bar meus komme. In 2015 sjting die bar nog in zien eige Witte Hoes, maar op as-woensdig is die bar met vuul blood, zjweit en traone verplaats naor ’t tuinhuuske.

Binne in ’t kefee hangk ein unieke geur: eine mix van versjaold beer, vers getapt beer, restjes broëne fruitsjaol, zjweit en ein vleugje Obstler. D’r is genne wifi, d’r wuurd gewuun aajerwets ge-aldehoord.

D’r wuurd auch allein maar beer gedronke. ’t Verhaol geit, det d’r op ein gegaeve moment eine verdwaalde gas aankwaam, dae eine munt-thië besjtelde. Naodet de kastelein de sjpaarkas in ein köpke heit water had ömgesjud, is hae vertrokke en hebbe we ‘m noeits miër truuk gezeen.

Natuurlik hangk auch op ein prominente plek “De Sjpaarkas”. ’t Oetroope van de Sjpaarkasprins is natuurlik ’t hoëgtepunt van ’t Hutje Mutje drök is ’t heej bal. Maar direk dao nao kump toch ’t lichte van de Sjpaarkas. Idderein kiek oet naor ’t ontvange van ’t envelöpke met zien gesjpaarde geld. In de haop det ’t genog is öm de kommende vastelaovend de nuedige pilskes te kenne drinke.

Tiédes alle edities van ’t Sjpaarkasbal “Hutje Mutje”, haet d’n tuin (dae euveriges altiëd picobello wuurd ongerhaaje) al mennig kier op zien grondveste sjtaon sjudde. Heejdoor is de tuinmoer al 2 x gans opniej gemetseld motte waere.

Door ’t jaor haer wuurd d’r euveriges auch vuul gebroek gemak van ’t kefee. Zoë is d’r ein kaart club actief, dart club “Sjot in de roës” en ein buurmanne club onger de naam “A-je-to”. Verder is d’r auch nog ein biljart club, onger de naam “Gen K-eus”, actief. Det biljart ken volautomatisch in de Tegelse klei zakke, zoëdet d’r (nog sjteeds gen) voldoende plaats is veur Hutje Mutje drök is ’t heej!